Вчера беа растерани над 40 возила на Средно Водно од страна на полицијата во подоцните ноќни часови, откако преку ден кафиќите вриеа со народ, а парковите беа полни со родители и деца. Бабите и дедовците на прошетка испоседнати на клупи… ма идила, човече!

Пролет иде, нели… треба лудило да биде… ама не и во ова кризно време.

Ало луѓе, дали сте свесни дека цела Европа е во карантин? Косово после 2 пријавени случаи ги затвори кафиќите и ноќните барови, како и трговските центри, јавниот превоз, а за два дена од сега и авиолиниите?

За поздравување е секоја драстична радикална мерка, и не од некаков мизерен политички аспект бидејќи политиката во овие ситуации е најзанемарлива, туку од аспект на држава која го става здравјето на граѓаните пред се’.

Само што, за нас не се никакви радикални мерки и препораки потребни, ние сме имуни на се’. Ние корона не можеме да фатиме бидејќи веќе страдаме од морона вирус. Ние сме себични и се’ што знаеме е да се курчиме низ градот без маски и да кашламе колку што можеме посилно и подалеку без дланка, а камоли во лакт, ние сме сите млади и ако не’ фати брзо ќе не одмине. Ние пари немаме, а корона најмногу на пари се лепела… ние без кафе-шема не’ можеме, па и нека е смак света!

Ох, министре… за нас само полициски час, овај стап, де.

За нас само пендрек и стап, за нас само ќотек и оф-боли. Пие макијато со друштво, оп стап. Се шета по аптеки и продавници без маски, оп стап. Се лепи и ти дише во врат додека чекаш ред на каса – оп стап. Оди да се коцка и обложува со исто пенкало и на исти апарати клика – оп стап. Плука, кашла и кива без ништо да преземе – оп стап. Искача навечер журки да прави – оп стап. Детето го пушта со други деца по паркови – оп стап. Бабите и дедовците се сончаат по клупи и се мафтаат по пазари – оп стап… бидејќи тие се всушност, најранливата категорија.

На секое кршење препорака – оп стап. Дали е физичко лице или правно, не е битно. Приватњаци не ги пуштаат родителите до 10 годишна возраст дома – оп стап, друг не пушта со хронична болест – оп стап.

Бидејќи ќотекот од рајот излегол, а овој народ едино само на тоа е научен.

П.С. Ако не е ќотекот, удри го на друг начин, по џебот. Кафе пиење 300 евра, плукање по улица 500 евра, кашлање и кивање без маска – 600 евра… па да видиме дали пак ќе се курчат.

Засрамете се! Наместо да седите дома и да го искористите времето за себе и своето семејство, да покажете дека ви е стало до нив и да одите вие во продавница наместо родителите, да поиграте со нив некоја друштвена игра, да се позанимавате со учење некое ново хоби, да направите некој рецепт… вие се ставате во ризик и себеси и своите најблиски. Вие со вашата „совест“ ги загрозувате комшиите и пријателите. Вие ја ставате околината во ризик.

И додека споделувате мемиња со „ништо не ми може короната“, солите памет за „несовесните“ и држите предавања како „млади сте и еднаш се живее“, сетете се на своите најкревки.

Марија Прличкова

©majkatiitatkoti.com  Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира