Здрма силен земјотрес
(полноќен и летен)
и ги исплаши луѓето.
Ништо не урна
но ги растревожи луѓето.
И сите излегоа надвор –
пижамести, разголени,
поспани, разбушавени.
Соседи кои одвај се
поздравуваа,
соседи кои се немаа
видено со месеци.
Се групираа, коментираа,
се качуваа по Меркалиевата,
слегуваа по Рихтеровата скала.
Еден скришум се качи по скали
и донесе шише ракија.
Се опуштија, се расприкажаа
и до сабајле
гласно се смееја.

14.09.96
1:15